Adroddodd y Cyfarwyddwr Corfforaethol Cymunedau am ddiweddariad ar waith i gefnogi Cynhadledd y Pleidiau 2022 ac i gefnogi’r Cyngor i arwyddo Datganiad i hysbysu Cynhadledd y Pleidiau yn 2022.

Dywedodd y Cyfarwyddwr Corfforaethol Cymunedau wrth y Cabinet fod Llywodraeth yr Alban, mewn partneriaeth â Chonfensiwn y Cenhedloedd Unedig ar Amrywiaeth Fiolegol, yn arwain ar ‘Broses Caeredin’, sef ymgynghoriad byd-eang ar-lein gyda llywodraethau is-genedlaethol a lleol ledled y byd ar eu rôl yn y Fframwaith a thargedau Bioamrywiaeth Byd-eang ôl-2020. Dywedodd mai un o ganlyniadau allweddol Proses Caeredin yw’r Datganiad, y bwriedir iddo ddangos ymrwymiad awdurdodau is-genedlaethol ar draws y byd i gyflawni dros fyd natur dros y degawd nesaf. Bwriad y ddyletswydd bioamrywiaeth sydd wedi’i chynnwys yn Neddf yr Amgylchedd (Cymru) 2016 yw cefnogi ymdrechion i wrthdroi’r dirywiad a sicrhau cydnerthedd hirdymor bioamrywiaeth yng Nghymru. Roedd y Cyngor wedi cymeradwyo ei Flaengynllun Bioamrywiaeth a Chydnerthedd Ecosystemau, 2018-2022, yn 2018, gan gyfrannu at dargedau Bioamrywiaeth a Chydnerthedd Ecosystemau.

Dywedodd y Cyfarwyddwr Corfforaethol Cymunedau fod Llywodraeth Cymru wedi gofyn i bob awdurdod lleol yng Nghymru ystyried llofnodi’r Datganiad.

Wrth gymeradwyo’r cynnig i lofnodi’r Datganiad, cyfeiriodd yr Aelod Cabinet dros Lesiant a Chenedlaethau’r Dyfodol at y swm mawr o waith bioamrywiaeth sy’n cael ei wneud yng Nghwm Ogwr mewn ardaloedd fel hen safle’r olchfa. Dywedodd yr Aelod Cabinet Cymunedau y byddai’n fwy na pharod i lofnodi’r Datganiad ar ran y Cyngor.

PENDERFYNWYD:      Bod y Cabinet yn cefnogi llofnodi’r Datganiad i hysbysu Cynhadledd y Pleidiau 2022 a rhoi awdurdod i’r Aelod Cabinet Cymunedau lofnodi’r Datganiad ar ran y Cyngor.