Cyflwynwyd adroddiad gan y Cyfarwyddwr Corfforaethol – Gwasanaethau Cymdeithasol a Lles, er mwyn ceisio awdurdod i amrywio'r contractau presennol sydd ar waith gyda'r tri gwasanaeth byw â chymorth a gomisiynwyd ar gyfer pobl ag anabledd dysgu, drwy ymestyn y telerau presennol am 12 mis arall, yn unol â’r Rheol Gweithdrefn Contract (CPR) 3.2.9.3.

Esboniodd fod y Cabinet, ym mis Tachwedd 2019, wedi cymeradwyo proses gaffael dau gam ar gyfer ail-gomisiynu darparwyr gwasanaethau i ddarparu gwasanaethau byw â chymorth i unigolion ag anabledd dysgu sy'n byw ym Mhen-y-bont ar Ogwr. Symudodd y cynllun ail-gomisiynu i ffwrdd o'r contractau 'ledled y sir' presennol gyda 3 darparwr gwasanaeth, i fodel sy'n seiliedig ar 'ardal' lle gall darparwyr gwasanaethau ddarparu cymorth lleol sy'n canolbwyntio ar yr unigolyn i bobl sy'n eu galluogi i ymgysylltu'n llawnach yn eu cymuned leol ac sy'n helpu i hyrwyddo eu taith tuag at annibyniaeth yn well.

Yn dilyn yr uchod, ym mis Mawrth 2020, cymeradwyodd y Cabinet ddyfarnu cytundeb fframwaith i gynigwyr llwyddiannus, ac i'r Cyngor ddechrau gweithredu'r broses o gaffael tendrau galw i ffwrdd o'r gwasanaeth ardal leol yng Nghyfnod 2. Pobl yn Gyntaf Pen-y-bont ar Ogwr (PFB) oedd y corff annibynnol a fyddai'n rhan o'r broses hon, ychwanegodd y Cyfarwyddwr Corfforaethol – Gwasanaethau Cymdeithasol a Lles.

Rhagwelwyd y byddai'r holl dendrau gwasanaeth ardal leol yn digwydd dros gyfnod o 12 mis, rhwng mis Ebrill 2020 (pan ddechreuodd cytundebau fframwaith) a Mawrth 2021, pan ddaw'r contractau presennol i ben.

Dechreuodd gwaith ymgynghori ac ymgysylltu'r PFB drwy gyfarfodydd wyneb yn wyneb ag unigolion yn y gwasanaeth ym mis Mawrth 2020, ond oherwydd effaith sylweddol ac anrhagweladwy pandemig Covid-19 a’r cyfyngiadau symud a ddeilliodd o hynny, bu'n rhaid i'r rhain ddod i ben yn fuan wedyn, ym mis Ebrill.

Gyda chyfyngiadau symud cenedlaethol a lleol yn cyfyngu ar ymgynghori wyneb yn wyneb, bu dibyniaeth ar ddulliau ymgynghori rhithwir yn hytrach nag ymgysylltu wyneb yn wyneb, sy'n cael effaith ddifrifol ar effeithiolrwydd yr ymgysylltu, a hefyd yr amserlenni sydd eu hangen i ymgysylltu'n llawn â phob cynllun byw â chymorth cyn tendro'r contractau gwasanaeth ardal leol, y trefnwyd iddynt gael eu cwblhau'n wreiddiol erbyn mis Mawrth 2021.

Cynigiwyd y dylid ymestyn y contractau presennol sydd ar waith gyda'r tri darparwr gwasanaeth am 12 mis arall felly, hyd at 31 Mawrth 2022, sef yr amser y bernir ei fod yn angenrheidiol er mwyn cynnal ymgynghoriad llawn ac ystyrlon, yn unol â'r dull comisiynu a gymeradwywyd yn flaenorol gan y Cabinet.

Roedd darpariaeth o dan CPR 3.2.9.3 i geisio addasu contract presennol, o dan y meini prawf a nodir ym mharagraff 4.2 o'r adroddiad.

Roedd yr angen am addasiad wedi'i gyflwyno gan effaith pandemig Covid-19, amgylchiadau na allai'r Cyngor fod wedi'u rhagweld wrth ymrwymo i'r contractau gwreiddiol. Ni fydd natur gyffredinol y contract yn cael ei newid, ac mae'r holl delerau cytundebol eraill yn aros yn ddigyfnewid, gan fod yr amrywiad arfaethedig ar gyfer estyniad o 12 mis yn unig. Nid yw'r addasiad arfaethedig yn fwy na 50% o werth gwreiddiol y contract. Roedd y goblygiadau ariannol fel y dangosir yn yr adroddiad yn manylu ar werth yr addasiad arfaethedig.

Roedd yr Aelod Cabinet – Gwasanaethau Cymdeithasol a Chymorth Cynnar yn cefnogi'r adroddiad yn llawn, gan ychwanegu bod hyn yn barhad o ddarparu gwasanaethau hanfodol i oedolion sy'n agored i niwed. Roedd hi'n gyfarwydd â chontract Cartrefi ac roedd yn falch iawn o weld dilyniant o ran darparu gwasanaethau i'r bobl yr oedd mawr angen hyn arnynt, yn enwedig yn wyneb argyfwng Covid-19.

Adleisiodd yr Arweinydd yr uchod, gan ychwanegu ei fod yn falch o weld bod y Cyngor wedi ymrwymo i gynnal ymgynghoriad ac ymarfer ymgysylltu llawn gydag unigolion a gefnogwyd gan y cynlluniau hyn, cyn gynted ag y byddai amgylchiadau'n caniatáu i ni wneud hynny. Teimlai ei bod yn hanfodol bwysig bod y cymorth a ddarperir yn parhau i ganolbwyntio ar yr unigolyn gyda chymorth o'r fath yn canolbwyntio ar anghenion a gofynion penodol yr unigolion dan sylw, gyda'r nod a'r amcan hefyd, i wella a chynyddu'r cymorth hwn, lle y bo'n bosibl. 

PENDERFYNWYD:                              Bod y Cabinet wedi awdurdodi addasu'r contractau presennol gyda Chartrefi (Lot 1), Mirus (Lot 2) a DRIVE Ltd (Lot 3) drwy ymestyn y telerau presennol am 12 mis arall i 31 Mawrth 2022, yn unol â CPR 3.2.9.3 y Cyngor.