Cyflwynwyd adroddiad gan y Cyfarwyddwr Corfforaethol – Addysg a Chymorth i Deuluoedd, mewn perthynas â'r mater uchod.

Eglurodd ar y ffordd y cafodd ei gyflwyno, yn dilyn proses gaffael yn 2018, fod y Cyngor wedi dyfarnu contract ar gyfer cyflenwi cludiant o'r cartref i'r coleg i First Cymru Buses Ltd.  Roedd y contract hwnnw i fod i ddod i ben ar 7 Ionawr 2021. 

Yn dilyn yr adroddiad i'r Cabinet ym mis Medi 2020, ar ganlyniad yr ymgynghoriad cyhoeddus ar y newidiadau arfaethedig i Bolisi Cludiant o'r Cartref i'r Ysgol/Coleg y Cyngor, atgoffodd yr Aelodau, fod y Cabinet yn penderfynu bod swyddogion y Gyfarwyddiaeth Addysg a Chymorth i Deuluoedd, ynghyd â swyddogion cludiant, yn parhau i drafod â darparwyr trafnidiaeth y sector preifat, Coleg Pen-y-bont ar Ogwr a darparwyr ôl-16 eraill, er mwyn gwneud arbediad. Roedd hyn hefyd o gymorth mwy sylweddol i greu cyllideb a fydd yn rhoi 'tocyn teithio' i fyfyrwyr. Byddai hyn yn fwy hyblyg na chludiant traddodiadol o'r cartref i’r coleg a byddai'n ateb mwy "aeddfed" i bobl ifanc.

Er mwyn i'r ymgysylltiad a nodwyd symud ymlaen â'r holl ddarpar gyflenwyr a rhanddeiliaid ac i amrywiaeth o opsiynau gael eu cynnig i'w hystyried gan y Cabinet ar y trefniadau ar gyfer tocyn teithio ôl-16 yn y dyfodol, cynigiwyd y dylai'r Cyngor atal y rheolau gweithdrefn contract a gwneud contract gyda First Cymru Buses Ltd ar yr un telerau â'r contract presennol o 8 Ionawr 2021 tan 25 Mehefin 2021 (hy diwedd y flwyddyn academaidd). Mae hyn yn angenrheidiol gan na fydd gwaith i ddatblygu tocyn teithio ac asesiad o'r datblygiad sy'n ofynnol gan y Cyngor i ddwyn hyn ymlaen, yn debygol o gael ei gwblhau tan ddiwedd mis Ebrill 2021, ar y cynharaf.  Mae adolygiad yn mynd rhagddo hefyd gan Lywodraeth Cymru i Deithio gan Ddysgwyr, a'i brif ffocws oedd dysgwyr ôl-16, ychwanegodd y Cyfarwyddwr Corfforaethol – Addysg a Chymorth i Deuluoedd. Roedd hyn i fod i ddod i ben ym mis Mawrth 2021.

O dan reolau gweithdrefn contract y Cyngor, mae'n ofynnol i'r Cyngor dendro a hysbysebu contractau fel hwn ar 'Sell2Wales' o leiaf.  Ni fydd y Cyngor, wrth ymrwymo i gontract yn y modd hwn, yn gallu cydymffurfio â'r gofynion hynny. 

Cwblhaodd y Cyfarwyddwr Corfforaethol – Addysg a Chymorth i Deuluoedd, ei gyflwyniad, drwy gynghori y dylai'r Cabinet fod yn ymwybodol bod y Cyngor, drwy beidio â chydymffurfio â'i reolau gweithdrefn contract, yn agored i'r risg o her bosibl gan gyflenwyr cynhyrchion o'r fath, gan ein bod yn ymrwymo i gontract heb unrhyw gystadleuaeth sy'n torri gofynion deddfwriaeth gaffael.

Dywedodd yr Aelod Cabinet – Addysg ac Adfywio, fod deialog ddiddorol yn parhau gyda First Cymru a thrydydd partïon eraill o ran ceisio dull mwy arloesol, addas i oedolion o ddarparu trafnidiaeth i oedolion ifanc a rhoddodd y cynigion yn yr adroddiad gyfle i'r awdurdod addysg ddatblygu'r trafodaethau hynny ymhellach, gyda'r bwriad o sefydlu math newydd o drefniadau trafnidiaeth ar gyfer myfyrwyr 16 oed a throsodd a myfyrwyr o'r Cartref i'r Coleg.

PENDERFYNWYD:                                                 Bod y Cabinet wedi:

 • Atal y rhannau perthnasol o reolau gweithdrefn contract y Cyngor mewn perthynas â'r gofynion sy'n ymwneud â chaffael y contract ar gyfer cyflenwi cludiant o'r cartref i'r coleg; ac wedi

 • Rhoi awdurdod dirprwyedig i'r Cyfarwyddwr Corfforaethol Addysg a Chymorth i Deuluoedd mewn ymgynghoriad â'r Prif Swyddog Dros Dro – Cyllid, Perfformiad a Newid a’r Swyddog Adran 151 a Phrif Swyddog - Gwasanaethau Cyfreithiol, Adnoddau Dynol a Rheoleiddiol, i ymrwymo i gontract ar gyfer cyflenwi cludiant o'r cartref i'r coleg gyda First Cymru Buses Ltd rhwng 8 Ionawr 2021 a 25 Mehefin 2021