Cyflwynodd y Cyfarwyddwr Corfforaethol Cymunedau adroddiad i roi’r wybodaeth ddiweddaraf i’r Cabinet ar farchnata safle'r siop fwyd yn ddiweddar (ar ran o faes parcio'r Green a Salt Lake); a cheisiodd gymeradwyaeth i benodi a chael gwared ar y safle i'r cynigydd a ffafrir, yn unol â'r penawdau telerau arfaethedig.

Esboniodd y Cyfarwyddwr Corfforaethol Cymunedau fod y safle wedi'i hysbysebu ar werth ar y farchnad agored gan EJ Hales, asiant penodedig y Cyngor.ym mis Medi 2020. Rhoddodd y Gofynion Gwneud Cynnig i'r Cabinet fel y'u rhestrir yn adran 4 yr adroddiad.

Amlinellodd y Cyfarwyddwr Corfforaethol Cymunedau y broses ddethol yn dilyn y cynigion. Dywedodd fod cyfanswm o 5 cynnig, 3 ohonynt yn methu â chydymffurfio gan nad oeddent yn cyd-fynd â'r brîff datblygu cynllunio, a 2 gynnig a oedd yn cydymffurfio.

Roedd manylion y cynigion yn fasnachol sensitif ac maent felly’n ddienw fel a ganlyn; fe'u graddiwyd yn nhrefn y cynigion o’r gwerth uchaf i'r isaf am y pris i'w dalu am y tir:

• Cynnig 1 : Ddim yn Cydymffurfio: nid oedd y cais yn cyd-fynd â'r Briff Datblygu Cynllunio
• Cynnig 2 : Yn cydymffurfio
• Cynnig 3 : Yn cydymffurfio
• Cynnig 4 : Ddim yn Cydymffurfio: nid oedd y cais yn cyd-fynd â'r Briff Datblygu Cynllunio
• Cynnig 5 : Ddim yn Cydymffurfio: nid oedd y cais yn cyd-fynd â'r Briff Datblygu Cynllunio

Esboniodd y Cyfarwyddwr Corfforaethol Cymunedau fod Cynnig 1, nad oedd yn cydymffurfio yn flaenorol, wedi dod yn ôl gyda chynigion pellach ers hynny. Yn anffodus, roedd yr ystyriaethau hyn yn dal i beidio â chydymffurfio. Cyflwynwyd cynnig 2 gan Aldi Stores Ltd ac felly dyma’r cynigydd a ffefrir.

Ychwanegodd fod EJ Hales Ltd wedi ardystio bod y cais a ffefrir yn eu barn hwy yn gynnig ariannol hynod ddeniadol ac o ran gwerth mae'n sicrhau'r ystyriaeth orau.

Pwysleisiodd y Cyfarwyddwr Corfforaethol Cymunedau mai'r cam yr oeddem yn edrych arno ar hyn o bryd oedd y cam gwaredu. Os byddai Aldi yn mynd ymlaen i brynu'r tir, byddai angen iddynt gyflwyno cais cynllunio ar gyfer hyn.

Croesawodd yr Aelod Cabinet - Addysg ac Adfywio yr adroddiad gan obeithio bod hwn yn garreg filltir yn adfywiad Porthcawl. Diolchodd i Aelodau Lleol Porthcawl am eu cefnogaeth barhaus gyda'r strategaeth a oedd wedi bod mewn grym ers sawl blwyddyn. Gofynnodd i'r Cyfarwyddwr Corfforaethol a oedd unrhyw waith dylunio neu ddelweddau o'r sut allai’r adeilad edrych fel bod gan drigolion Porthcawl syniad o'r hyn i'w ddisgwyl.

Esboniodd y Cyfarwyddwr Corfforaethol Cymunedau fod y brasluniau a gyflwynwyd yn fasnachol sensitif ar hyn o bryd gan ei fod yn ddyluniad pwrpasol. Roedd hyn nes i'r cynigydd llwyddiannus ddod yn berchennog y tir yn swyddogol. Esboniodd, unwaith y byddai Aldi wedi cyflwyno'r dyluniadau i gynllunio i'w hystyried, byddent yn hapus i'r dyluniadau gael eu rhannu â thrigolion ac i weithio gyda CBSPAO ar gyd-farchnata ac ymgynghori â thrigolion yngl?n â hyn.

Croesawodd yr Aelod Cabinet - Gwasanaethau Cymdeithasol a Chymorth Cynnar yr adroddiad gan nodi ei bod yn gyffrous gweld y datblygiad hwn yn digwydd. Ychwanegodd fod trigolion Porthcawl wedi dangos eu cefnogaeth iddo ar gyfryngau cymdeithasol. Gofynnodd i'r Cyfarwyddwr Corfforaethol, yn ddarostyngedig i'r gweithdrefnau cynllunio ac ati, pryd yr oedd trigolion Porthcawl yn debygol o weld drysau'r siop newydd yn agor.

Esboniodd y Cyfarwyddwr Corfforaethol Cymunedau ei fod yn ddibynnol ar amserlen pob cam, ond gallem ddisgwyl gweld y cais cynllunio yn cael ei gyflwyno cyn pen 6 mis, pe bai'r Cabinet yn cymeradwyo'r adroddiad, ac yna'n datblygu i ddechrau cyn pen 6 mis ar ôl cymeradwyo cais cynllunio. Fodd bynnag, roedd Aldi yn awyddus i ddechrau datblygu cyn gynted â phosibl.

Esboniodd yr Aelod Cabinet - Cymunedau ei bod yn bwysig bod y datblygiad hwn yn sefyll fel ychwanegiad i ganol tref Porthcawl, yn hytrach nag yn ei erbyn. Gofynnodd pa lefel o integreiddio fyddai ganddo â chanol y dref ar hyn o bryd.

Esboniodd y Cyfarwyddwr Corfforaethol Cymunedau fod cynlluniau ar gyfer adeiladu cysylltiadau teithio egnïol yn ogystal â llwybrau troed i ganiatáu i'r datblygiad newydd gysylltu'n dda â chanol y dref.

Ychwanegodd mai'r nod yn ychwanegol at hyn, gyda datblygiadau ym Mhorthcawl yn y dyfodol, oedd agor y llwybrau a'r ffyrdd h?n i ddarparu cyswllt teithio sefydlog rhwng yr holl ddatblygiadau.

Gofynnodd yr Arweinydd i'r cynigydd llwyddiannus sicrhau datblygiad o safon uchel fel y byddai'r porth hanfodol i ganol y dref a'r promenâd yn cael ei wella'n llawn. Gofynnodd i'r Cyfarwyddwr Corfforaethol a oedd hyn wedi'i gyflawni.

Cadarnhaodd y Cyfarwyddwr Corfforaethol Cymunedau fod y cynlluniau cyfredol yn addawol. Roeddent yn bwriadu defnyddio deunyddiau lleol a phwrpasol ar gyfer y datblygiad ynghyd â rhai nodweddion pensaernïol, gan gynnwys mannau agored i'r cyhoedd. Roedd eu cynlluniau hefyd yn amddiffyn rhai o'r golygfeydd allweddol wrth yrru tuag at y môr. 

Gofynnodd yr Arweinydd a oedd cynlluniau pellach ar waith i ddatblygu seilwaith cyfan Porthcawl yn dilyn y datblygiad hwn.

Esboniodd y Cyfarwyddwr Corfforaethol Cymunedau fod cynlluniau pellach ar waith i ddatblygu llwybrau teithio mwy egnïol ym Mhorthcawl a'r cyffiniau, datblygu'r meysydd parcio yn ogystal â chyswllt bws. Ychwanegodd fod hyn yn rhan o'r darlun ehangach o ran adfywio Porthcawl.

PENDERFYNWYD                              Bod y Cabinet:

• Yn cymeradwyo gwaredu safle siop fwyd Porthcawl i Aldi Stores Ltd a gwneud y cytundeb ar gyfer prydlesu ar y telerau a amlinellir yn yr adroddiad hwn ac ar y cynnig pris gwerthu am y tir ac yn ddarostyngedig i'r pwynt bwled isod.

• Yn dirprwyo awdurdod i'r Cyfarwyddwr Corfforaethol - Cymunedau, mewn ymgynghoriad â'r Prif Swyddog - Gwasanaethau Cyfreithiol, AD a Rheoleiddio a'r Swyddog Adran 151, i gymeradwyo telerau'r cytundeb gwaredu a llunio'r cytundeb, gyda'r bwriad o'i gwblhau'n gyfreithiol y gwerthiant cyn gynted â phosibl.