Cyflwynwyd adroddiad gan y Prif Swyddog Dros Dro - Cyllid, Perfformiad a Newid, yn argymell y dylai'r Cabinet fabwysiadu Cynllun Rhyddhad Ardrethi Manwerthu, Hamdden a Lletygarwch 2021-22 Llywodraeth Cymru a Chynllun Rhyddhad Ardrethi Lletygarwch a Hamdden Uwch Llywodraeth Cymru ar gyfer 2021-22.

Eglurodd y Prif Swyddog Dros Dro - Perfformiad, Cyllid a Newid, mai nod y ddau gynllun oedd helpu busnesau i leihau eu taliadau ardrethi busnes ar gyfer y cyfnod o 01/04/21 i 31/03/22 er mwyn eu cefnogi i barhau i feddiannu safleoedd y Stryd Fawr a manwerthu, a chefnogi'r rheini yn y sectorau lletygarwch, hamdden a thwristiaeth. Cyhoeddodd Llywodraeth Cymru estyniad dros dro i'r Cynllun Rhyddhad Ardrethi Manwerthu, Hamdden a Lletygarwch presennol ar gyfer 2021-22 i gefnogi eiddo cymwys sy'n cael ei feddiannu drwy gynnig cymorth 100% i fusnesau yn y sector manwerthu, hamdden a lletygarwch sydd â gwerth ardrethol o dan £500,000. Manylwyd ar safleoedd a fyddai'n elwa yn Atodiad A i'r adroddiad, ond yn fras roeddent yn cynnwys y rhai a oedd â gwerth ardrethol o lai na £500,000, a siopau, tafarndai a bwytai, campfeydd, lleoliadau perfformio a gwestai ledled Cymru. Cyhoeddodd Llywodraeth Cymru hefyd y byddai Cynllun Rhyddhad Ardrethi Lletygarwch a Hamdden Uwch ar gael ar gyfer blwyddyn ariannol 2021-22, i gefnogi busnesau cymwys o fewn y sector lletygarwch, hamdden a thwristiaeth yng Nghymru sydd â gwerth ardrethol o dros £500,000. Cafodd y gwahanol gategorïau o adeiladau lletygarwch, hamdden a thwristiaeth a fyddai'n elwa o ryddhad eu nodi yn Atodiad B i'r adroddiad ac roeddent yn cynnwys y rhai a oedd â gwerth ardrethol o dros £500,000, a'u bod yn westai, parciau gwyliau a stadia ledled Cymru. Byddai Llywodraeth Cymru yn darparu rhyddhad ardrethi o 100% ar gyfer eiddo cymwys ar gyfer blwyddyn ariannol 2021-22.

Byddai'r Cynllun Rhyddhad Ardrethi Manwerthu, Hamdden a Lletygarwch ar gyfer 2021-22 yn rhedeg ochr yn ochr â'r Cynllun Rhyddhad Ardrethi i Fusnesau Bach. Amcangyfrifwyd y byddai tua 1,000 o drethdalwyr cymwys ar draws y fwrdeistref a allai elwa o beidio â chael unrhyw gyfraddau i'w talu ar gyfer blwyddyn ariannol 2021-22 o dan y Cynlluniau hyn.

Dywedodd y Dirprwy Arweinydd fod hwn yn adroddiad "newyddion da" ac y byddai'r 1000 o fusnesau ar draws CBSP yn falch iawn o glywed bod yr awdurdod yn mabwysiadu'r fenter hon. Gofynnodd y Dirprwy Arweinydd am eglurhad ynghylch a oedd angen i'r busnesau hynny a gymhwysodd yn 2021 ai peidio ailymgeisio am y rhyddhad. Atebodd y Prif Swyddog Dros Dro - Cyllid, Perfformiad a Newid, nad oedd angen iddynt ailymgeisio a dylid cymhwyso hyn yn awtomatig i'w cyfrifon ym mron pob achos.

Gofynnodd yr Arweinydd a ddylai busnes ddisgwyl derbyn bil gan yr awdurdod hyd yn oed os oedd am sero neu a ddylent ddisgwyl derbyn unrhyw ohebiaeth yn amlinellu eu bod wedi cael rhyddhad ardrethi ar eu cyfrif.

Cadarnhaodd y Prif Swyddog Dros Dro - Cyllid, Perfformiad a Newid, y byddent yn derbyn bil gyda'r goddefeb awtomatig arno. Ychwanegodd nad oedd ganddi'r union wybodaeth gyda hi ond roedd hi o dan yr argraff bod y biliau eisoes wedi'u hanfon allan. Dywedodd yr Arweinydd y gallai busnes gysylltu â'r awdurdod os na chafodd gadarnhad bod y rhyddhad wedi'i gymhwyso a diolchodd i'r Prif Swyddog Dros Dro - Cyllid, Perfformiad a Newid a'i thîm am weinyddu'r cynlluniau.

PENDERFYNWYD             Bod y Cabinet wedi mabwysiadu Cynllun Rhyddhad Ardrethi Annomestig, Manwerthu, Hamdden a Lletygarwch ar gyfer 2021-22 a'r Cynllun Rhyddhad Ardrethi Lletygarwch a Hamdden Uwch ar gyfer 2021-22 fel y nodir yn Atodiad A ac Atodiad B yr adroddiad.