Cyflwynodd Pennaeth y Gwasanaethau Rheoliadol a Rennir adroddiad, a’i ddiben oedd ceisio cymeradwyaeth y Cyngor i gyhoeddi Datganiad o Egwyddorion Trwyddedu’r Cyngor ar gyfer y cyfnod nesaf o dair blynedd o 2022 i 2025.

Dywedodd fod gan y Cyngor fel awdurdod lleol swyddogaethau strategaeth o dan y Ddeddf Hapchwarae ac felly roedd yn rhaid iddo gyflawni'r rhain yn effeithiol.

Roedd yr adroddiad yn amlinellu'r ymateb i'r ymgynghoriad a gynhaliwyd mewn perthynas â'r uchod ac yn gwneud argymhellion ar gyfer diwygiadau i'r Datganiad o Egwyddorion Trwyddedu. Roedd y diwygiadau arfaethedig wedi'u hamlygu mewn coch yn y ddogfen yn Atodiad A i'r adroddiad.

Roedd yr adolygiad arfaethedig hefyd wedi ystyried effaith digynsail y pandemig Coronafeirws ar fusnesau a oedd yn darparu cyfleusterau gamblo.

Roedd Paragraff 3.5 yr adroddiad yn nodi’r tri amcan trwyddedu a oedd yn ganolog i reoleiddio gamblo a’r egwyddorion y mae’n ofynnol i’r Cyngor weithredu oddi tanynt yn unol â'r rhain.

Pwysleisiodd Pennaeth y Gwasanaethau Rheoliadol a Rennir nad oedd gan y Cyngor gyfrifoldeb am hapchwarae ar-lein. Dim ond am weithgareddau trwyddedadwy ar safleoedd trwyddedig yr oedd y Cyngor yn gyfrifol amdanynt a dangoswyd rhai enghreifftiau o’r rhain ym mharagraff 3.3 yr adroddiad.

Ychwanegodd fod yn rhaid i'r Cyngor gyhoeddi'r Polisi y mae'n rhaid cytuno arno bob tair blynedd.

Dywedodd Pennaeth y Gwasanaethau Rheoliadol a Rennir wrth yr Aelodau fod Pwyllgor Trwyddedu'r Cyngor wedi cymeradwyo'r adroddiad yn flaenorol ac argymhellodd ei fod wedyn yn cael ei gyflwyno i'r Cyngor i'w gadarnhau. Argymhellodd y Pwyllgor ymhellach fod y Cyngor yn cymeradwyo’r set bresennol o egwyddorion, i’w cyflwyno am y cyfnod o dair blynedd nesaf.

Er iddo wneud y pwynt nad oes gan yr awdurdod lleol gyfrifoldeb am hapchwarae ar-lein, roedd hyn yn cael  effaith sylweddol ar ein cymunedau lleol, ac felly roedd yn integreiddio â rhai o bolisïau’r Cyngor, megis gofalu am lesiant a/neu iechyd meddwl unigolion.

Felly, rhoddodd sicrwydd i’r Aelodau fod swyddogion awdurdodau lleol yn ymgysylltu’n rheolaidd â’r Comisiwn Hapchwarae, Llywodraeth Cymru ac efallai’n bwysicaf oll, â’r Prif Swyddog Meddygol, a oedd i gyd yn cydnabod sut mae hapchwarae’n effeithio’n andwyol ar gymunedau lleol ac roeddent yn edrych ar gamau i reoli hyn.

Felly, daeth Pennaeth y Gwasanaethau Rheoliadol a Rennir i’r casgliad, er na allai'r Polisi reoli gamblo ar-lein, fod y gwasanaeth yn ceisio defnyddio cymaint o liferi ag sy'n bosibl, i amddiffyn aelodau'r cyhoedd allan yn y gymuned. Roedd yn hawdd trwy hapchwarae ar-lein colli cannoedd o bunnoedd mewn mater o funudau, heb i rywun orfod gadael ei ystafell fyw. Felly, roedd yr her i’w rwystro, ei atal neu ei leihau, yn un anodd.

Gan mai hwn oedd cyfarfod olaf Pennaeth y Gwasanaethau Rheoliadol a Rennir o’r Cyngor cyn ymddeol, dymunodd y Maer ynghyd ag Aelodau eraill y gorau iddo yn ei ymddeoliad a phwysleisiodd y ffaith ei fod wedi bod yn Swyddog rhagorol yn gofalu am fuddiannau etholwyr tri awdurdod lleol, a oedd yn her ynddi’i hun a wnaed yn llawer gwaeth, oherwydd y gwaith ychwanegol yr oedd y gwasanaeth wedi’i wneud yn ystod y pandemig.

Ategodd yr Arweinydd y teimladau hyn gan ychwanegu bod Dave Holland a’i gydweithwyr yn llythrennol wedi achub miloedd o fywydau pobl yn ystod y pandemig trwy waith caled a oedd ar adegau wedi bod yn ormesol ar staff o fewn y gwasanaeth. Dymunodd yr aelodau'r gorau hefyd i'w olynydd Helen Picton.

Diolchodd Pennaeth y Gwasanaethau Rheoliadol a Rennir i'r Aelodau am eu geiriau caredig ar ei ran ef a'i Swyddogion, a oedd wedi gwerthfawrogi'n fawr y gefnogaeth yr oedd yr Aelodau wedi'i rhoi iddynt, yn enwedig yn ystod cyfnod Covid-19.

PENDERFYNWYD:                     Bod y Cyngor yn cymeradwyo’r Datganiad o Egwyddorion Trwyddedu, yn ymgorffori’r diwygiadau a amlygwyd yn Atodiad A yr adroddiad, ynghyd â’r diwygiad ychwanegol ym mharagraff 4.6 a chymeradwyo ei gyhoeddi yn unol â'r rheoliadau priodol.