Dywedodd y Cyfarwyddwr Corfforaethol Gwasanaethau Cymdeithasol a Llesiant fod y Gwasanaeth Mabwysiadu Cenedlaethol (NAS) wedi bod mewn bodolaeth ers 2014, gan alluogi newid a gwelliant sylweddol mewn gwasanaethau mabwysiadu ledled Cymru.  Dywedodd fod pob cyngor wedi cytuno ar ei strwythur a'i lywodraethu drwy drefniadau cenedlaethol, rhanbarthol a lleol bryd hynny ac arweiniodd adolygiad yn 2018 at gynigion i symleiddio llywodraethu a gwella atebolrwydd.  Mae creu Bwrdd Llywodraethu Cyfunol (gan ddod â'r Gr?p Cynghori a'r Bwrdd Llywodraethu sy'n ofynnol o dan y ddeddfwriaeth at ei gilydd) a Chytundeb Partneriaeth newydd i ddisodli'r model swyddogaethol gwreiddiol wedi'u rhoi ar waith.

Dywedodd y Cyfarwyddwr Corfforaethol Gwasanaethau Cymdeithasol a Llesiant, er mwyn i'r trefniadau gael eu rhoi ar sail ffurfiol, y dylid sefydlu Cyd-bwyllgor Cenedlaethol a chyda chytundeb yn sail i'w ymestyn i gynnwys Maethu Cymru.  Dywedodd y bydd y Cydbwyllgor Cenedlaethol, ar ran y 22 Awdurdod Lleol yng Nghymru, yn arfer eu pwerau i ddarparu'r trefniadau cydweithredol ar gyfer Gwasanaeth Mabwysiadu Cenedlaethol Cymru ac ar gyfer Maethu Cymru, gan gynnwys Aelodau'r Cyngor a chyfarfod ddwywaith y flwyddyn.  Mae Cytundeb Cyfreithiol Cyd-bwyllgor i'w lofnodi gan bob un o'r 22 awdurdod lleol wedi'i ddrafftio gan gyfreithwyr Cymdeithas Llywodraeth Leol Cymru (CLlLC) sydd hefyd yn cynnwys Cynllun Dirprwyo ffurfiol a darpariaeth ar gyfer y cytundeb ffurfiol gyda'r awdurdod lleol lletyol ar gyfer swyddogaethau cenedlaethol.  Dywedodd fod cyllid ar gyfer y trefniadau llywodraethu ac arweinyddiaeth a galluogi canolog / cenedlaethol yn cael ei ddarparu gan CLlLC drwy frigdoriad o'r Grant Cynnal Trethi ynghyd ag arian grant gan Lywodraeth Cymru, nid oedd disgwyliad y bydd cynghorau unigol yn wynebu costau ychwanegol mewn perthynas â'r swyddogaethau hyn.

PENDERFYNIAD:           Bod y Cabinet wedi:

· Cymeradwyo'r Cyngor sy'n ymrwymo i Drefniant y Cydbwyllgor;

· Rhoi awdurdod dirprwyedig i'r Cyfarwyddwr Corfforaethol - Gwasanaethau Cymdeithasol a Llesiant mewn ymgynghoriad â'r Prif Swyddog – Cyllid, Perfformiad a Newid a'r Prif Swyddog – Cyfreithiol a Gwasanaethau Rheoleiddio, Adnoddau Dynol a Pholisi Corfforaethol i gytuno ar delerau terfynol Cytundeb y Cyd-bwyllgor ar gyfer y Gwasanaeth Mabwysiadu Cenedlaethol ac ymrwymo iddo fel y ddogfen gyfreithiol sy'n sefydlu'r Cydbwyllgor yn ffurfiol gyda swyddogaethau dirprwyedig;

· Cymeradwyo'r Aelod Cabinet - Gwasanaethau Cymdeithasol a Chymorth Cynnar yn eistedd fel cynrychiolydd y Cyngor ar y Cydbwyllgor;

· Cymeradwyo Cyngor Caerdydd i weithredu fel awdurdod lletyol ar gyfer y trefniant ac yn dirprwyo awdurdod i'r Cyfarwyddwr Corfforaethol - Gwasanaethau Cymdeithasol a Llesiant mewn ymgynghoriad â'r Prif Swyddog – Cyllid, Perfformiad a Newid a'r Prif Swyddog – Cyfreithiol a Gwasanaethau Rheoleiddio, Adnoddau Dynol a Pholisi Corfforaethol i gytuno ar delerau terfynol y cytundeb cynnal a'i ymrwymo iddo;

· Rhoi awdurdod dirprwyedig i'r Cyfarwyddwr Corfforaethol - Gwasanaethau Cymdeithasol a Llesiant mewn ymgynghoriad â'r Prif Swyddog – Cyllid, Perfformiad a Newid a'r Prif Swyddog – Cyfreithiol a Gwasanaethau Rheoleiddio, Adnoddau Dynol a Pholisi Corfforaethol i gytuno ar delerau unrhyw ddogfennau ategol y mae'n ofynnol i'r Cyngor ymrwymo iddynt o ganlyniad i'r trefniant hwn a'u cynnwys ynddynt;

 Nodi y bydd adroddiad yn cael ei gyflwyno i'r Cyngor i ddiwygio Cyfansoddiad y Cyngor yn ôl yr angen i hwyluso'r gwaith o weithredu Cytundeb y Cydbwyllgor ar gyfer y Gwasanaeth Mabwysiadu Cenedlaethol.