(i) Maer (neu’r person sy’n llywyddu)

(ii) Aelodau’r Cabinet

(iii) Prif Weithredwr

Maer

 

Yn dilyn awgrym gan swyddogion a chyda chytundeb y cadeirydd, bydd cyfarfod y Pwyllgor Rheoli Datblygu a drefnwyd ar gyfer 29 Rhagfyr yn cael ei symud i ddydd Iau, 5 Ionawr 2023, er mwyn osgoi cyfnod y Nadolig / Blwyddyn Newydd. Bydd calendrau aelodau'n cael eu diweddaru yn unol â hynny i adlewyrchu'r newid hwn yn nyddiad y cyfarfod.

 

Mae’r Dirprwy Faer a minnau’n parhau i gyflawni cyfrifoldebau dinesig ar draws y fwrdeistref sirol gyfan a thu hwnt.

 

O ymweld ag ysgolion a cholegau, mynychu cyngherddau gyda'r nos a chael y fraint o fynychu nifer o seremonïau gwobrwyo, mae'n sicr yn gyfnod prysur.

 

Ond mae'n amser i atgoffa bod yna bobl ym Mwrdeistref Sirol Pen-y-bont ar Ogwr sy’n mynd ymhell y tu hwnt i’w dyletswydd i helpu’r rhai sy’n llai ffodus na ni.

 

Sy'n dod â mi at bwynt lle hoffwn eich atgoffa i gyd fod y broses enwebu ar gyfer Gwobrau’r Maer bellach ar agor. Dylai pob un ohonoch fod wedi derbyn neges e-bost yn cyflwyno'r broses ac wrth gwrs mae manylion llawn hefyd wedi'u cynnwys ar wefan Cyngor Bwrdeistref Sirol Pen-y-bont ar Ogwr. Edrychaf ymlaen at y ceisiadau niferus.

 

Roedd y penwythnos diwethaf wrth gwrs yn gyfnod o goffa pan wnaethoch chi i gyd, yn ddiamau, fynychu gwasanaethau a seremonïau coffa amrywiol ar draws y fwrdeistref sirol.

 

Fore Gwener diwethaf ar eich rhan, cyflwynais dorch pabi i Great Western Railway, a gludwyd i Lundain ynghyd â llawer o rai eraill. Ymunwyd â mi yn yr orsaf reilffordd gan y Dirprwy Arglwydd Raglaw, Maer Pen-y-bont ar Ogwr y Cynghorydd Tim Woods, Dirprwy Arweinydd y Cyngor y Cynghorydd Jane Gebbie, y Prif Weithredwr Mark Shepherd a llawer o bwysigion lleol eraill.

 

Roedd yn dipyn o olygfa gweld un cerbyd yn llawn torchau pabi.

 

Wrth gwrs, roedd Gorymdaith y Cofio yn nhref Pen-y-bont ar Ogwr yn achlysur difrifol a fynychwyd gan sawl un, yn arbennig gan bersonél presennol a chyn-aelodau’r lluoedd arfog. Roedd presenoldeb a chyfranogiad y cyhoedd yn anhygoel. Mae’r niferoedd cyhoeddus mawr hyn yn dangos y parch a’r didwylledd dwfn sydd gan ein cymunedau tuag at ein lluoedd arfog. Nid oes gennyf amheuaeth bod y parch hwn wedi'i ailadrodd ar draws Bwrdeistref Sirol Pen-y-bont ar Ogwr.

 

Y penwythnos diwethaf, cefais wahoddiad i gyflwyniad yng Nghanolfan Gymunedol Wildmill i ganolbwyntio ar berthynas Pen-y-bont ar Ogwr â llong danfor adeg rhyfel HMS Urge. Rhoddwyd y cyflwyniad ar y cyd gan Francis Dickinson, ?yr capten y llong danfor, a’r Cynghorydd Steve Bletsoe.

 

Roedd disgynyddion llawer o deuluoedd yn bresennol, gan gynnwys, yn rhyfeddol, merch capten y llong, gwraig hyfryd, swynol, a gyflwynodd ei hun fel Bridget.

 

Mabwysiadwyd HMS Urge gan bobl Pen-y-bont ar Ogwr ond, yn anffodus, fe'i collwyd ym mis Ebrill 1942 oddi ar arfordir Malta. Bu farw pob un o'r 44 aelod o'r criw. Roedd y llong danfor wedi taro ffrwydryn môr Almaenig yn ystod gweithrediadau arbennig.

 

Nid tan 2019 a bron i 80 mlynedd yn ddiweddarach y darganfuwyd y llong ar waelod gwely'r môr.

 

Roedd yn brofiad teimladwy iawn siarad â disgynyddion o'r teulu ac roedd rhai ohonynt yn amlwg dan deimlad yn ystod ac ar ôl y cyflwyniad.

 

Roeddent i gyd yn werthfawrogol iawn o'r cynhesrwydd a'r lletygarwch a ddarparwyd iddynt ym Mhen-y-bont ar Ogwr.

 

Roedd aelodau'r teulu hefyd yn bresennol ac yn gosod torch yn Seremoni'r Cofio ddydd Sul.

 

A gaf i achub ar y cyfle hwn i ddiolch i Gyngor Tref Pen-y-bont ar Ogwr am gefnogi'r digwyddiad hwn ac yn arbennig i'r Cynghorydd Steve Bletsoe a'i wraig y Cynghorydd Freya Bletsoe am eu cyfraniad personol.

 

Nid oes amheuaeth bod y gefnogaeth hon wedi codi proffil Bwrdeistref Sirol Pen-y-bont ar Ogwr.

 

Ac, yn olaf, mynychais Castle Bingo yma ym Mhen-y-bont ar Ogwr yn ddiweddar, lle cyflwynwyd siec o £2,000 i mi ar gyfer Elusen y Maer.

 

Bydd hwn yn cael ei roi yn y gronfa i gefnogi'r rhai sy'n cael eu dal yn y sefyllfa ofnadwy yn Wcráin.

 

A gaf i ddiolch i holl staff ac aelodau Castle Bingo am y rhodd hael hon? A gaf i hefyd eich gwahodd chi i wneud cyfraniad hefyd?

Efallai yn lle anfon cerdyn Nadolig, byddai rhodd fechan i’r elusen yn rhywbeth sy’n fwy na chyfartal i ddathlu’r Nadolig yn lle.

 

Byddaf yn estyn allan yn fuan at holl aelodau a swyddogion yr awdurdod gyda gwahoddiad i wneud y rhodd honno.

 

Hoffwn hefyd dynnu sylw'r aelodau at y ffaith y bydd Diwrnod AIDS y Byd ymhen pythefnos ar 1 Rhagfyr cyn y cyfarfod nesaf.

Mae Diwrnod AIDS y Byd yn foment y byddwn yn cymryd amser i fyfyrio a chofio pawb yr ydym wedi'u colli i epidemig HIV AIDS.

 

Mae eleni hefyd yn nodi 40 mlynedd ers creu Ymddiriedolaeth Terrence Higgins, a enwyd ar gyfer Terry Higgins o Orllewin Hwlffordd, a oedd yn un o'r bobl gyntaf yn y DU i farw o AIDS yn anffodus. Mae Ymddiriedolaeth Terrence Higgins yn gweithio ar draws y DU i gefnogi'r rhai sy'n byw gydag HIV. Heddiw, ni all pobl sy'n byw gydag HIV sy'n cael triniaeth effeithiol drosglwyddo'r feirws ac mae ganddynt ddisgwyliad oes sydd yr un fath ag unrhyw un arall.

 

Fodd bynnag, mae llawer o bobl sy'n byw gydag HIV yn dal i wynebu stigma oherwydd safbwyntiau hen ffasiwn. Rwy’n croesawu gwaith Llywodraeth Cymru ar gael gwared ar y stigma hwn fel rhan o Gynllun Gweithredu Cymru ar HIV.

 

Dirprwy Arweinydd ac Aelod Cabinet – Gwasanaethau Cymdeithasol

 

Mae Wythnos Ddiogelu 2022 ar y gweill ar hyn o bryd, ac rydym wedi bod yn gweithio gyda phartneriaid o dan faner Bwrdd Diogelu Rhanbarthol Cwm Taf Morgannwg i ddatblygu rhaglen o ddigwyddiadau addysgol a gweithgareddau codi ymwybyddiaeth.

 

Y thema ar gyfer eleni yw 'diogelu ein cymunedau rhag cam-fanteisio', ac rydym yn tynnu sylw at hyn drwy ystod o ddigwyddiadau ar-lein ac wyneb yn wyneb sydd wedi'u hanelu at weithwyr proffesiynol, plant, pobl ifanc a chymunedau ar draws y rhanbarth.

 

Bydd hyn yn cynnwys lansio Safonau Diogelu, Dysgu a Datblygu Cenedlaethol cwbl newydd gan Julie Morgan, y Dirprwy Weinidog Gwasanaethau Cymdeithasol.

 

Yn cyd-fynd yn agos â Gweithdrefnau Diogelu Cymru, mae’r safonau’n nodi disgwyliadau’r dyfodol o ran gwybodaeth, sgiliau, agweddau a gwerthoedd ar gyfer unrhyw un sy’n gweithio gydag oedolion a phlant a allai fod mewn perygl o gael eu cam-drin, eu niweidio neu eu hesgeuluso.

 

Yn ogystal â’r safonau newydd – y cyntaf i Gymru – mae rhaglen lawn o ddigwyddiadau wedi’i chynhyrchu ar gyfer yr wythnos gyfan. Mae hon ar gael i’w gweld ar wefan Cwm Taf, a byddwn yn annog aelodau i edrych yn agosach arni a hefyd i aelodau gael cipolwg ar yr arddangosfa Camfanteisio Rhywiol wrth i chi fynd i mewn i’r adeilad dinesig.

 

Hoffwn hefyd roi gwybod i aelodau am waith dwy elusen deilwng iawn.

 

Yn gyntaf, mae Gr?p Cefnogi Colli Babanod Bro Morgannwg lleol wedi bod yn cefnogi teuluoedd mewn profedigaeth ers mwy na deng mlynedd bellach, gan gyfarfod ar nos Fercher cyntaf pob mis yn Ysbyty Tywysoges Cymru rhwng 7pm a 9pm. 

 

Mae’r gr?p yn cael ei hwyluso gan ddwy fydwraig profedigaeth ac mae’r cyfarfodydd yn cynnig amgylchedd diogel a chyfrinachol lle gall pobl wrando ar brofiadau mamau eraill sydd wedi cael profedigaeth, rhannu eu profiadau eu hunain, a chynnig cyngor a chefnogaeth i’w gilydd.

 

Yn ail, bydd y mudiad CRY yn codi ymwybyddiaeth o’i waith yr wythnos nesaf, a byddwn yn gwerthfawrogi cefnogaeth yr holl aelodau, swyddogion ac aelodau’r cyhoedd, sy’n bersonol iawn i mi.

 

Mae CRY, sy’n sefyll am Ymchwil Gardiaidd mewn Pobl Ifanc (Cardiac Research in the Young), yn ceisio atal marwolaethau cardiaidd ymhlith pobl ifanc trwy wella ymwybyddiaeth, cynyddu argaeledd sgrinio, a chefnogi ymchwil bellach i’r cyflwr.

 

Mae'r elusen hefyd yn ceisio cefnogi pobl sy'n byw gyda chyflwr cardiaidd yn ogystal ag aelodau teulu'r rhai nad ydynt wedi goroesi.

 

Ar hyn o bryd, mae CRY yn cefnogi fy merch, fy mab-yng-nghyfraith a thri o wyrion ac wyresau, sydd i gyd mewn perygl o gael digwyddiad cardiaidd mawr. Mae profion genetig yn mynd rhagddynt ar hyn o bryd gyda chefnogaeth yr elusen yn ogystal â'r diffibriliwr cludadwy a roddir i'r teulu i'w ddefnyddio mewn argyfwng amlwg.

 

Ar ôl teimlo effaith digwyddiad mor drawmatig yn ein teulu, teimlaf ei bod yn hanfodol bwysig fy mod yn defnyddio’r llwyfannau gwleidyddol sydd ar gael i mi i dynnu sylw at yr elusen benodol hon yn dilyn marwolaeth fy ?yr 19 oed ym mis Ionawr 2020. Nid yw’n lleddfu poen colled Justin mewn unrhyw ffordd, ond efallai y bydd o gymorth i deuluoedd eraill drwy godi ymwybyddiaeth o’r materion penodol hyn ac rwy’n cydnabod y cymorth y maent wedi’i roi i ni nad yw ar gael gyda’r GIG.

 

Mae CRY a Gr?p Cymorth Colli Babanod Bro Morgannwg yn darparu gwasanaethau pwysig i bobl Bwrdeistref Sirol Pen-y-bont ar Ogwr.

 

Mae’r ddau ohonynt yn haeddu ein cefnogaeth, a gobeithio y bydd yr aelodau’n rhoi gwybod i’w hetholwyr eu bod ar gael.

 

Gall unrhyw un a hoffai gael rhagor o wybodaeth wneud hynny drwy ymweld â gwefannau'r ddwy elusen neu drwy ymweld â lolfa'r aelodau, lle rwyf wedi gadael llu o adnoddau i'w harchwilio.

 

Aelod Cabinet – Cymunedau

 

Mae gennyf newyddion rhagorol yr hoffwn eu rhannu â’r aelodau.

 

Diolch i ymdrechion trigolion lleol, mae Bwrdeistref Sirol Pen-y-bont ar Ogwr unwaith eto wedi rhagori ar dargedau Llywodraeth Cymru ar gyfer ailgylchu gwastraff a'i ddargyfeirio o safleoedd tirlenwi.

 

Mae’r ffigurau diweddaraf wedi cadarnhau ein bod wedi cyflawni cyfradd ailgylchu o 72.6 y cant. Mae hyn yn golygu, o ran perfformiad, bod Bwrdeistref Sirol Pen-y-bont ar Ogwr wedi’i rhestru fel yr ail ardal orau yng Nghymru, gyda dim ond Sir Benfro yn sgorio ychydig yn uwch.

 

Ar ben hynny, rydym yn un o ddim ond pedwar awdurdod lleol sydd nid yn unig wedi rhagori ar y targed ailgylchu presennol o 64 y cant, ond sydd eisoes wedi rhagori ar darged cenedlaethol 2024-25 o 70 y cant.

 

Mae hwn yn ganlyniad gwych. Bob tro y bydd Llywodraeth Cymru yn codi’r bar, mae trigolion lleol yn ymateb i’r her i sicrhau ein bod ymhlith y gorau yng Nghymru, ac rwyf am ddiolch iddynt am eu hymrwymiad a chyfranogiad parhaus.

 

Rwyf hefyd am ddiolch i ymdrechion ein staff ymroddedig a’n partneriaid gwastraff, Kier.

 

Fel y gwyddoch, mae Llywodraeth Cymru wedi gosod targed heriol i gyflawni dim gwastraff yng Nghymru erbyn 2050 drwy symud i economi gylchol sy'n cadw adnoddau mewn defnydd.

 

Mae ein hymdrechion ar y cyd yma ym Mwrdeistref Sirol Pen-y-bont ar Ogwr yn cyfrannu'n sylweddol at gyflawni'r uchelgais hwn.

 

Aelod Cabinet – Adnoddau

 

Hoffwn ofyn i’r aelodau helpu i ledaenu ymwybyddiaeth ymhlith cymunedau lleol am y Gronfa Ymddiriedolaeth Plant.

 

Wedi'i sefydlu fel menter gan y llywodraeth ar gyfer plant a anwyd rhwng 1 Medi 2002 a 2 Ionawr 2011, gwelodd y cynllun bob plentyn yn derbyn £250 i ddechrau cyfrif cynilo hirdymor.

 

Mae'r cronfeydd o fewn pob cyfrif wedi aros yn anghyffyrddadwy nes bod y plant yn cyrraedd deunaw oed.

 

Wrth i hyn ddod i ben, mae Cyllid a Thollau EM wedi dweud bod miloedd o gronfeydd aeddfed yn y Gronfa Ymddiriedolaeth Plant wedi mynd heb eu hawlio hyd yma.

 

Mae hyn yn golygu y gallai pobl ifanc yn eu harddegau lleol o bosibl fod â chynilion gwerth £2,100 ar gyfartaledd yn aros amdanynt.

 

Amcangyfrifir bod 6.3 miliwn o gyfrifon Cronfa Ymddiriedolaeth Plant wedi'u sefydlu tra oedd y cynllun ar waith.

 

Os nad oedd rhiant neu warcheidwad yn gallu agor un ar gyfer plentyn, gwnaeth CThEM hynny ar ran y plentyn, felly mae siawns dda iawn y bydd plant sy’n cael eu geni rhwng y dyddiadau hynny yn gallu elwa ohono nawr.

 

Y ffordd hawsaf o gael gwybod yw ymweld â gwefan GOV.UK a llenwi ffurflen ar-lein a fydd yn nodi ble mae'r arian yn cael ei ddal neu, os yw darparwr y gronfa ymddiriedolaeth yn hysbys eisoes, gwneud ymholiadau yn eich cangen leol agosaf.

 

Gyda llawer o bobl ifanc cymwys yn eu harddegau yn paratoi i adael yr ysgol neu ddechrau prifysgol, prentisiaeth neu eu swydd gyntaf, gallai’r Gronfa Ymddiriedolaeth Plant gynnig hwb ariannol y mae mawr ei angen iddynt, a gobeithio y bydd yr aelodau’n helpu i ledaenu’r newydd.

 

Aelod Cabinet – Adfywio

 

Ynghyd â chyd-aelodau yn y Cabinet, llwyddais i ymweld â Neuadd y Dref Maesteg yn ddiweddar i gael golwg ar sut mae’r gwaith yno’n dod yn ei flaen, ac rwy’n hapus i adrodd bod yr hyn a welsom wedi gwneud argraff fawr arnom.

 

Mae'r contractwyr Knox and Wells wrthi'n gorffen y gwaith o osod to 'llofft olau' newydd a fydd yn cysylltu'r adeilad presennol â'r estyniad newydd i greu mynedfa gyhoeddus newydd.

 

Bydd y rhan hon o'r datblygiad yn cynnwys cyntedd newydd, caffi cyhoeddus a chyfleuster mannau newid.

 

Bydd hefyd yn cynnwys gofod perfformio newydd, hyblyg a balconi mesanîn unigryw, ynghyd â bar a stiwdio, mae'n sicr o ddod yn fan pwysig i’r gymuned pan fydd y gwaith adeiladu wedi'i gwblhau.

 

Yn ystod y gwaith o adfer yr adeiledd rhestredig Gradd II 141 oed, mae nifer o nodweddion hanesyddol wedi'u datgelu sydd wedi'u cadw ac yn cael eu defnyddio unwaith eto.

 

Er bod gwneud y gwaith ychwanegol hwn wedi cael effaith ganlyniadol ar yr agoriad arfaethedig, rydym yn hyderus y bydd neuadd y dref ar ei newydd wedd yn barod i agor ei drysau eto'r haf nesaf.

 

Aelod Cabinet – Cenedlaethau’r Dyfodol

 

Yn ddiweddar, derbyniodd yr aelodau yr wybodaeth ddiweddaraf am sut mae'r cyngor yn gweithio ochr yn ochr â sefydliadau cymorth lleol i nodi ffyrdd y gallwn gydweithio i helpu cymunedau i fynd i’r afael â heriau'r argyfwng costau byw.

 

Mae'r cyngor yn cydlynu'r ymateb yn lleol ac yn parhau i ddatblygu dull gweithredu ochr yn ochr â'i bartneriaid allweddol.

 

Mae cyfarfodydd eisoes wedi eu cynnal yn ardaloedd Cwm Ogwr a Pencoed, ac mae mwy i fod i gael eu cynnal ym Maesteg a Mynyddcynffig. 

 

Mae'r cyfarfodydd hyn yn edrych yn benodol ar sut y gall lleoliadau a digwyddiadau presennol addasu i ddod yn lleoedd lle mae pobl yn teimlo croeso cynnes ac yn cael eu cefnogi yn ystod misoedd y gaeaf.

 

Mae’r cyfarfodydd wedi bod yn gyfle gwych i arweinwyr cymunedol ddod i wybod am ymdrechion a chynlluniau diweddaraf, ac i wneud awgrymiadau yngl?n â’r ffordd orau i ni gydweithio i gefnogi trigolion lleol.

 

Maent hefyd wedi bod yn ddefnyddiol i osgoi dyblygu ymdrechion – er enghraifft, mewn ardaloedd lle mae banciau bwyd neu gynhesrwydd yn rhedeg eisoes – ac i sicrhau bod trigolion lleol yn manteisio’n llawn ar yr holl gymorth presennol, yn amrywio o gludiant cymunedol i grantiau gwisg ysgol.

 

Y bwriad yw cyfuno'r ddarpariaeth bresennol wrth ddatblygu gweithgareddau newydd. Er enghraifft, mae arian grant mannau cynnes wedi'i ddarparu gan Lywodraeth Cymru, ac unwaith y bydd cynnig ffurfiol wedi'i wneud, bydd y cyngor yn ei ddarparu i sefydliadau sy'n cefnogi'r ddarpariaeth hon yn ein cymunedau lleol.

 

Mae Awen wedi cyflwyno eu prosiect Mannau Cynnes eu hunain, gan annog pobl i dreulio mwy o amser mewn llyfrgelloedd lleol trwy gynnig amgylchedd croesawgar, cyfforddus gyda diodydd cynnes a gweithgareddau newydd.

 

Mae cynlluniau hefyd ar waith i ddatblygu hyn ymhellach trwy ychwanegu sesiynau newydd ar gelf, crefft a cherddoriaeth i annog mwy o gyfranogiad.

 

Gan fod llawer o drigolion yn ei chael hi'n anodd cael cyngor ynghylch ynni, mae canolfannau gwaith lleol, Cymdeithas Mudiadau Gwirfoddol Pen-y-bont ar Ogwr a Chyflogadwyedd Pen-y-bont ar Ogwr yn cynnal digwyddiadau lle gall pobl leol gael cyngor a chymorth.

 

Yn un o'r digwyddiadau hyn a gynhaliwyd yn ddiweddar yng Nghanolfan Waith Maesteg, roedd y cyfranogwyr yn gallu siarad ag asiantaethau allweddol fel D?r Cymru am eu hamgylchiadau a'u biliau ac roeddent yn gallu lleihau rhai o'u costau.

 

Gyda’r digwyddiad arfaethedig nesaf i’w gynnal yng Nghapel Dyffryn Caerau ddydd Mercher 30 Tachwedd, mae tudalen we costau byw newydd wedi’i sefydlu ar wefan y cyngor sydd wedi’i dylunio i gynnig cyngor a chymorth pellach ac i helpu i roi’r wybodaeth ddiweddaraf i bobl ar ddatblygiadau a digwyddiadau lleol.

 

Gall cael gafael ar y cymorth cywir ar yr adeg gywir wneud gwahaniaeth gwirioneddol i bobl sy’n cael trafferth, a gobeithio y bydd aelodau’n gwneud defnydd o’r adnoddau hyn ac yn annog eu hetholwyr i fanteisio ar y digwyddiadau rhad ac am ddim hyn.

 

Aelod Cabinet – Addysg

 

Hoffwn roi’r wybodaeth ddiweddaraf i’r aelodau am y cyfleuster gofal plant cyfrwng Cymraeg yr ydym yn ei sefydlu ym Metws.

 

Fel y gwyddoch, mae hwn yn un o dri hwb o’r fath yr ydym yn eu sefydlu ar gyfer y fwrdeistref sirol, gyda thri arall yn yr arfaeth ym Mhorthcawl, Pen-y-bont ar Ogwr a Melin Ifan Ddu fel rhan o fuddsoddiad cyffredinol o £2.8 miliwn mewn gofal plant cyfrwng Cymraeg.

 

Wedi’i adeiladu ar yr un safle â’r hen Glwb Bechgyn a Merched, mae’r gwaith adeiladu wedi’i gwblhau i raddau helaeth, ac rydym bellach wedi cyrraedd y pwynt lle’r ydym yn paratoi i arddangos y cyfleusterau i ddarpar ddarparwyr ar 22 a 23 Tachwedd.

 

Wedi'i gynllunio i wasanaethu Cwm Garw ac ardal porth y cymoedd o'i amgylch, bydd hwb Betws yn darparu 16 o leoedd gofal plant cyfrwng Cymraeg, ynghyd â chwe lle i blant iau hyd at ddwy oed.

 

Wrth i'r ddarpariaeth ddatblygu, bydd yn cynnig darpariaeth gofal plant y tu allan i oriau ysgol a bydd yn gweithredu am hyd at 51 neu 52 wythnos o'r flwyddyn.

 

Rydym am i’r adeilad unllawr gynnig gofal dydd llawn o ddydd Llun i ddydd Gwener, a bydd yn cynnwys man chwarae newydd, ystafelloedd tawel, cyfleusterau chwarae meddal, canopi pob tywydd, cyfleusterau storio, swyddfeydd, a maes parcio ceir gyda lle i saith cerbyd.

 

Bydd yr hwb newydd yn gwasanaethu teuluoedd ar draws Cwm Garw sydd am i’w plant gael eu haddysgu drwy gyfrwng y Gymraeg.

 

Mae hefyd yn dangos ein hymrwymiad parhaus i gynyddu nifer y siaradwyr Cymraeg lleol wrth annog y Gymraeg i ffynnu a thyfu.

 

Prif Weithredwr

 

Mae gennyf gyhoeddiad byr iawn i’r aelodau.

 

Mae Comisiwn y DU ar Goffáu Covid yn cynnal ymgynghoriad cenedlaethol ar sut y dylid cofio’r pandemig byd-eang.

 

Mae rhai o’r cynigion hyd yn hyn wedi cynnwys pennu dyddiadau priodol ar gyfer diwrnod coffa cenedlaethol, awgrymiadau ar addysg i blant, a nodi cyflawniadau allweddol megis datblygiad y brechlynnau a chyfraniad gwirfoddolwyr.

 

Gofynnwyd inni fel awdurdod lleol am ein barn ar hyn, ac yr wyf yn llunio ymateb y gellir ei anfon yn ôl at CLlLC.

 

Fe fyddan nhw wedyn yn llunio ymateb swyddogol i’r comisiwn sy’n cynrychioli barn llywodraeth leol Cymru.

 

Yr wyf yn si?r y bydd gan yr aelodau eu barn eu hunain ar y ffordd orau o wneud hyn, ac efallai y byddwch am ymgynghori â’ch etholwyr hefyd.

 

Y dyddiad cau ar gyfer diwedd yr ymgynghoriad yw dydd Llun 5 Rhagfyr, felly os oes gennych unrhyw awgrymiadau, anfonwch nhw ataf cyn y dyddiad hwn, a byddaf yn gwneud yn si?r eu bod yn cael eu cynnwys yn ein hymateb i CLlLC.