Cyflwynwyd yr adroddiad hwn gan Bennaeth Addysg a Chymorth i Deuluoedd. Ei ddiben oedd:

• rhoi'r wybodaeth ddiweddaraf i'r Cabinet am y prosiect Meithrin Perthynas Gyda'n Gilydd (RBT); ac
• amlinellu cerrig milltir allweddol cyn gofyn am gymeradwyaeth ffurfiol y Cabinet ym mis Medi 2023, yn dilyn cymeradwyaeth pwyllgor Cronfa Gwaddol Ieuenctid (YEF) ar 24 Gorffennaf 2023.

Roedd y pwyntiau allweddol fel a ganlyn:

• Ar 2 Chwefror 2023, llwyddodd yr awdurdod lleol i sicrhau cais am tua £800 mil drwy’r Gronfa Gwaddol Ieuenctid (YEF).
• Allan o 59 o geisiadau ledled Cymru a Lloegr, mae’r prosiect RBT yn un o ddim ond tri phrosiect llwyddiannus a’r unig brosiect yng Nghymru i sicrhau cyllid. Mae'r prosiect RBT yn werthusiad o wasanaethau sy'n gweithio gyda phlant gan ddefnyddio'r Model Adfer ar ôl Trawma (TRM). Mae diddordeb arbennig gan y Swyddfa Gartref yn y prosiect i ystyried sut y gall y gwerthusiad lywio polisi yn y dyfodol ynghylch gweithio gyda phlant sydd wedi profi trawma.
• Bydd y prosiect yn cael ei dreialu o fewn chwe thîm ar draws yr holl gr?p cymorth i deuluoedd a chaiff ei roi ar waith o fis Medi 2023 tan fis Mawrth 2025.
• Ym mis Medi 2023, bydd yr awdurdod lleol yn ymrwymo i gytundeb lefel gwasanaeth (CLG) gyda YEF. Bydd y CLG llawn ar gael yn dilyn cymeradwyaeth pwyllgor YEF ar 24 Gorffennaf 2023. Caiff y CLG a’i delerau ac amodau llawn eu rhoi i’r Cabinet fel diweddariad yn y cyfarfod nesaf ar 19 Medi 2023.
• Er mwyn i weithrediad y prosiect ddod i rym o 20 Medi 2023, mae angen i adrannau gynllunio dros gyfnod yr haf a chyn dyddiad cyfarfod y Cabinet ym mis Medi 2023.
• Mae YEF wedi darparu enghraifft o’u telerau ac amodau cyffredinol i’w hystyried a nodir yn Atodiad A. Caiff y cytundeb terfynol, o fewn unrhyw delerau ac amodau penodedig, ei ddarparu ar 19 Medi 2023.

Gofynnodd Aelod y Cabinet dros Addysg i’r Pennaeth Addysg a Chymorth i Deuluoedd ddiolch i’r tîm a’u llongyfarch am yr holl waith caled i sicrhau cyllid ar gyfer y prosiect hwn. Roedd y ffaith mai dyma'r unig un yng Nghymru i sicrhau cyllid yn gamp ryfeddol.

Aeth ymlaen i bwysleisio bod hwn yn brosiect cydweithredol enfawr, gyda thimau'n gweithio ar draws y Cyngor, nid yn unig ym meysydd addysg a thrafnidiaeth, ond yn y gwasanaethau cymdeithasol a lles. Roedd hwn yn ddull cydweithredol un Cyngor gwirioneddol.

Credai, o ran monitro cynnydd, mai'r lle gorau fyddai Pwyllgor Rhianta Corfforaethol y Cabinet (CCCP).

Dywedodd yr Arweinydd ei fod yn cefnogi'r cynnig bod y prosiect yn adrodd i'r CCCP. Credai fod hwn yn brosiect peilot arloesol ac roedd yn gyffrous iawn yn ei gylch. Credai hefyd y byddai angen monitro'r canlyniadau'n ofalus, ond roedd yn sicr y byddent yn gadarnhaol ac mai un o gryfderau'r prosiect hwn oedd yr asesiad a'r gwerthusiad parhaus gan Brifysgol Caint.

Croesawodd Aelod y Cabinet dros Ddiogelwch Cymunedol a Lles y prosiect a gofynnodd sut y byddai’r canlyniadau’n cael eu cynnal unwaith y deuai’r cyllid i ben yn 2025. Ymatebodd Pennaeth Addysg a Chymorth i Deuluoedd mai'r gobaith oedd y byddai'r prosiect yn gadael etifeddiaeth gadarnhaol iawn. Byddai pum aelod newydd o staff, a byddai ganddynt y math o sgiliau y byddai ar y sefydliad eu hangen bob amser. Roedd risg gydag unrhyw gyllid dros dro, ond teimlid mai risg isel iawn ydoedd oherwydd y byddai swyddi gwag bob amser ar gyfer pobl o'r math yr oeddent yn gobeithio eu recriwtio.

PENDERFYNWYD:  Bod y Cabinet:

• yn nodi cynnwys yr adroddiad; ac

yn cymeradwyo mewn egwyddor cychwyn y prosiect ym mis Medi 2023 yn amodol ar gael telerau ac amodau terfynol a amlinellir yn y CLG.