Mae Cyfarwyddwr Corfforaethol Cymunedau wedi ceisio awdurdod i beidio ag adnewyddu Prydles Gwarchodfa Natur Cenedlaethol Cynffig pan fydd yn dod i ben ar 31ain Rhagfyr 2019 ac i roi'r rhybudd priodol ar Ymddiriedolaeth Corfforaeth Cynffig.  Bydd y Cytundeb Rheoli gyda Chyngor Cefn Gwlad Cymru yn dod i ben ar 31 Rhagfyr 2019 a cheisiwyd awdurdod i gysylltu â Chyfoeth Naturiol Cymru i roi gwybod y byddai'r Cyngor yn gadael Gwarchodfa Natur Cenedlaethol Cynffig ar 31 Rhagfyr 2019.

Dywedodd fod y Cabinet yn ei gyfarfod ar 14 Rhagfyr 2010 wedi awdurdodi swyddogion i weithio gydag Ymddiriedolaeth Corfforaeth Cynffig i ddatblygu opsiynau amgen ar gyfer rheoli'r Gwarchodfa Natur.  Yn ei gyfarfod ar 16 Hydref 2018 fe wnaeth y Cabinet gytuno ar newidiadau i'r ffordd mae'r gwarchodfa'n cael ei redeg oherwydd diffyg ymateb gan yr Ymddiriedolaeth i geisiadau'r Cyngor i roi caniatâd i alluogi sefydliad cymwys a phrofiadol addas i reoli'r warchodfa a manteisio i'r eithaf ar ei botensial fel atyniad ymwelwyr.  Rhwng 14 Rhagfyr 2010 a chyfarfod y Cabinet ar 11 Tachwedd 2014, fe wnaeth swyddogion gyflawni amrywiaeth o gamau gweithredu i gefnogi'r Ymddiriedolaeth i nodi asiant rheoli newydd ddigon ymlaen llaw cyn i'r Cyngor adael y safle. Yn anffodus ni chafwyd penderfyniad gan yr Ymddiriedolaeth. 

 Yn ei gyfarfod ar 11 Tachwedd 2014, fe wnaeth y Cabinet awdurdodi Pennaeth Adfywio a Datblygu i ddod â'r broses o ymchwilio i opsiynau rheoli'r Warchodfa i ben ac i'w redeg yn unol â threfniadau cyfredol, gan flaenoriaethu rhwymedigaethau statudol y Cyngor i warchod nodweddion ecolegol y Warchodfa.  Ers mis Chwefror 2015 mae swyddogion wedi datblygu a chyflawni nifer o brosiectau a ariannwyd yn allanol i ychwanegu gwerth at y gweithgareddau â blaenoriaeth yn y Cynllun Rheoli. 

Adroddodd Cyfarwyddwr Corfforaethol Cymunedau fod rhaid i'r Cyngor gydymffurfio gyda'r holl delerau prydles a chyfamodau tenant hyn a nodwyd yn y Brydles a'r Cytundeb Rheoli nes y dyddiad dod i ben ar y Brydles.  Yn dilyn dyddiad dod i ben y Brydles, nododd fod rhaid i'r Cyngor sicrhau fod y safle yn y cyflwr sy'n ofynnol yn ôl y Brydles, a bod y Cyngor yn gadael y safle'n briodol gan gael gwared ar ei holl offer, peiriannau ac unrhyw arwyddion.  Mae'r Brydles hefyd yn nodi y dylai'r Cyngor gael gwared ar unrhyw adeiladau ychwanegol, ychwanegiadau, newidiadau neu welliannau a wnaeth i'r safle ar ddiwedd y tymor ac i wneud iawn am unrhyw ddifrod a achoswyd drwy gael gwared ar y rhain.  Gallai fod yn ofynnol i'r Cyngor ddymchwel adeilad y ganolfan ymwelwyr cyn i'r Brydles ddod i ben, er nad yw hyn wedi'i godi gan yr Ymddiriedolaeth.  Os gwneir cais, bydd asesiad o'r gost yn cael ei gyflawni ac adroddiad pellach yn cael ei gyflwyno i'r Cabinet os oes angen.  

Adroddodd hefyd fod Cyngor Cymunedol Corneli ar hyn o bryd yn cyfrannu yn ariannol tuag at gostau'r Cyngor ar gyfer glanhau toiledau'r ymwelwyr yn y Warchodfa.  Pan fydd y Cyngor yn gadael y safle ni fydd ganddo unrhyw gyfrifoldeb mwyach ac ni fydd yn darparu unrhyw wasanaeth mewn perthynas â'r toiledau ymwelwyr.

Gwnaeth yr Aeloda Cabinet dros Addysg ac Adfywio sylw am bwysigrwydd y Warchodfa a'i ecoleg a bod swyddogion wedi ceisio datblygu opsiynau amgen i'w reoli.  Nododd nad oedd y cynnig i beidio ag adnewyddu'r Brydles wedi'i gymell gan angen y Cyngor i wneud arbedion a gobeithiai y gallai datrysiad rheoli cynaliadwy gael ei ganfod.  Fe wnaeth y Dirprwy Arweinydd wneud sylw ar arwyddocâd yr ardal a'i gymysgedd cyfoethog o dir a bywyd gwyllt ac roedd yn gwerthfawrogi'r ffordd roedd y Warchodfa'n cael ei rheoli.  Fe wnaeth yr Arweinydd wneud sylw am pa mor unigryw oedd y safle sydd o bwys rhyngwladol a bod cyllid wedi'i ddiogelu ar gyfer gwaith cadwraeth i'r twyni drwy'r prosiect "Dunes2Dunes".     

DATRYSWYD:           Bod y Cabinet:

(1)            Wedi pennu na fyddai Cyngor Bwrdeistref Sirol Pen-y-bont yn adnewyddu ei Brydles oedd yn dyddio i 25ain Ionawr 2001 ar gyfer Gwarchodfa Natur Cenedlaethol Cynffig pan fydd yn dod i ben ar 31ain Rhagfyr 2019 ac y bydd y Cyngor yn rhoi Rhybudd Adran 27 (1) o dan Ddeddf Landlordiaid a Thenantiaid 1954 ar Ymddiriedolaeth Corfforaeth Cynffig.

Wedi nodi y bydd y Cytundeb Rheoli oedd yn dyddio i 25ain Ionawr 2001 yn dod i ben ar 31ain Rhagfyr 2019 ac wedi awdurdodi'r Cyngor i roi gwybod i Cyfoeth Naturiol Cymru y bydd yn gadael Gwarchodfa Natur Cenedlaethol Cynffig ar y dyddiad hwn.